| 個人檔案醉過方知酒濃，愛過方知情重相片部落格清單 |  工具  說明 |
醉過方知酒濃，愛過方知情重酒能醉人，愛能迷人 2 September 07年9月1日（晴）誕生了！23 August 07年8月22日（微雨）散哂....肩背日積月累既疲勞損傷終於響今日得到解放
工作中有緣遇上一位「師太」
一直以來個頭久不久就會劇痛係因為長期既勞累導致
今日終於忍唔住要去試試求醫
呢位「師太」真係好勁，三兩下手勢、我d骨辟辟拍拍左好多聲就搞掂
雖然冶療過程我痛不欲生，不過完成後真係舒服好多
連頭都唔再痛，成個人好似拆散再重新砌返咁
走既時候佢仲好肯定咁話我知只要我休息一星期再去俾佢跟多次就以後都唔駛再黎
冇得頂！
醫療費反正都係公司俾，等我乜都去醫下先
 19 August 07年8月18日(晴)這麼近...那麼遠...時差...近日大家都為左感情既事而煩惱...
而大家都有一個共通點....時差...
點解!?點解每段感情都會有時差出現?
係咪要做到「同步」真係咁難?
好似阿鋒咁...寂寞太耐所以變成「見一個愛一個」
一開始就過份既付出或突如其來既過份既獻殷勤...往往都嚇怕對方...
明明人地可能會有少少好感或者感動，但一俾錯回應
就演變出連串誤會....就好似依家咁...
對方事後已經表明當時做錯左，對佢既只係感動而唔係同佢拍拖
可惜偏激憤世既阿鋒，反應已將所有人嚇出外太空....
想法野蠻得已不合情理...不斷鑽進自己的角尖...
不斷埋怨自己...埋怨別人...
埋怨點解自己花左好多錢用左好多心思去討不到對方歡心
旁人所有說話都聽不入耳，從此將自己鎖於自己的空間
不斷埋怨...埋怨...再埋怨....
更不幸的事...對方剛遇著比較善解人意既追求者阿飛
每天要面對著態度來勢洶洶既阿鋒，人家好自然地會被迫向安全既地方投靠
好自然地會顯得合得來，好自然會直接間接的幫人家拉得更近
每天不斷的埋怨，埋怨自己點解會輸，點解會輸俾邊個邊個
其實佢冇輸到俾任何人，而係輸左俾世上最強既敵人「自己」
埋怨因為自己做錯而間接直接令人地更顯情投意合打情罵俏既人地係做俾佢睇
埋怨人地係玩佢....
好心啦...人地早已經尊重左呢個兄弟，主動問左你你有冇興趣先，係諗住同你傾
點知你自己又答「冇野」即係自己放棄左在先，人地先開始追
響阿飛立場黎講，佢係唔知你對個女仔有冇興趣同行動在先既
人地追到又埋怨人地，仲用好差既態度對待
實在有點兒那個囉
勸、話、、鬧...都已經對阿鋒再冇功效，唯有等佢自己幫自己解鎖...
接著...
阿飛當然開心啦，等左四年終於再重新投入新感情
我都替佢高興既，雖然到現時都未有機會見過現任「阿嫂」
而阿鋒果邊又搞成咁...
始終「響果度食，盡量都唔響返果度痾」會冇咁麻煩既...
飛行石係我刻意唔幫你整既，響度講句唔好意思先
不論收到係開心定唔開心都好...
既野當然留返俾「有心人」送會比較有意義啦
見到你重新投入愛情路，相信你都已經想清楚
做兄弟既都唔講d咩啦，我相信你相信既路與方向
祝你愉快！
再接著...
妹妹豬就慘喇，本來放棄左阿銘諗住同返阿飛一齊
點知阿飛有新對象而遲遲唔敢開口講
到現在佢已經開始左已經冇機會講
或多或小其實妹妹自己都有做錯既
當初同阿飛分開係因為要阿飛生性d長進d
分開既時候大家承諾過會等會努力
等到依家足足四年...呢四年裡面阿飛真係有決心努力過
已經再冇遊手好閒，真係生性左好多
而且響呢四年裡面，佢都冇開始過一段新感情
可能因為佢冇乜機會，但始終佢都有堅守承諾，值得讚許錫返啖
但妹妹妳就真係唔在先喇...同阿飛分開冇幾耐就已經有阿銘既出現
雖然人地真係對妳好好又好錫妳，而妳亦唔忍心人地對妳一番好意所以同左人地一齊
不過妳自己應該都明白妳要既唔係好似阿銘咁悶咁Dry既男仔
同佢一齊一定有辣有唔辣，講到尾妳自己放棄左承諾
就算阿飛選擇唔返轉頭都冇得怨...
再接著...
唔係成日接觸既Sunny，尋日因為珮儀有機會同佢認真傾過計
之前都有間接聽過有關佢既感情事，但都好糢糊
原來佢都係因為「時差」同佢喜歡既女仔分開
Sunny係一個比較慢熱既男仔，個女仔初初對佢好有feel既時候佢仲未熱得來
到佢熱既時候...個女仔已經淡了，到個女仔熱返，大家既感覺已經唔同左
明明係一齊緊，見面時候既感覺只係好似見到一個識左好耐既老朋友差唔多
悲哀....
再接著...
無牌車主龍彪都係一樣，公司有個幾靚女既同事Amy
所有單身既男同事都對佢有興趣...
一個傻下傻下又響外國讀完書返黎既24歲但睇樣似18既女仔
剛剛成年既龍彪首先跑出，但同阿鋒既情況差唔多
只得一天，加上殺出個得19歲平時唔聲唔聲但響背後踩到龍彪落谷底既情敵阿耀得米
得左仲要返到黎串串貢懶有型咁，令到成team裡面上上下下知情既人都杯葛佢
真真抵死，不過就可憐左痴情既小朋友龍彪喇，又話要死又剩....
呢個女仔擺到明就係響果邊讀書耐左太寂寞所以拍下散拖啦
話唔定我地個個都媾佢佢個個都受添....
時差...往往都響感情路上令人吃盡苦頭
更令好多本來會好好既感情變得好陌生
明明大家距離相近，但相處就變得好遙遠
大家添上一層隔膜一樣
究竟要點樣先可以將「時差」拉近?
要點先可以做得到「同步」?
真係一門好深既學問....
如果感情路上冇「時差」呢樣野既話
相信世上唔會有咁多人唔開心....
15 July 07年7月8日（晴）生日夏水禮.....一年一度既夏水禮又到喇~
今年同埋我生日一齊搞，係第一次生日玩夏水
年年大家生日唔係唱K就落bar飲到天昏地暗，每次都會浪費左之後果日
所以今年真係好唔同，雖然生日氣氛冇咁強烈
但我覺得最重要既氣氛反而係，我長大多一年
又見證住我地呢班朋友既友誼同樣地長大了一年
這是值得興祝的！
雖然今次已經冇以前咁齊人，大家都忙著
但係都好多謝大家忙裡都抽空老遠俾面過來一齊玩
真係好開心
今年係第一次有女朋友一齊過生日
第一次唔再係自己一個躺在沙灘上聽浪睇星星
百感交雜.....
快樂的一天完結
又係時候醒返，返到現實世界繼續勞碌
繼續努力吧 3 July 07年7月2日(時晴時雨)無可奈何....呢幾日佢個妹上左黎，電腦被長時間佔用...勁舞團連場...
原本可以坐既地方連續三日都係成為佢張床...
到處亂亂的....比平時更亂....冇眼睇.....
唯一容身處就只有一放工返黎就死返自己床....
呢幾日都好累...腦裡好多野諗....
更表仲編錯左我要連返九日先有假放....
灰上加灰....
腦海都係浮沉著唔開心既事....
因為曾經對自己不忠既事重現....
雖然只係叫另一個「女仔」做老公....
好老實講，佢係唔係當人地係「女仔」...心照啦...
而且人地亦都好肯定唔係當自己係「女兒身」既身份叫返佢做「老婆」....
我覺得又再被欺騙了....我覺得其實由當日我撞破到現在....
佢地既關系都冇變過....雖然佢同我一齊住每日都見....
而佢地除左每日都會通電話，同佢會主動叫人地「你聽日打俾我啦」之外
都冇乜機會見面，咁究竟係我多心丫?還是因為一次又一次既傷害、欺騙
導致我唔再信任佢?
原本我都仲相信佢只係當人地係「女仔」既普通朋友
但再一次既叫人地做「老公」我好肯定事情絕對唔會係我諗得咁單純....
得來既解釋，只係唔耐煩既「我同佢冇野呀！」同埋一d冇乜point令我信服既理由....
又話咩「因為果陣係唔鐘意我所以先咁樣，但依家唔係」
但係我唔係點feel到依家有幾鐘意我，係既話相信唔會咁樣...
極唔開心....如果要令我信服，相信只有斷絕聯絡呢個方法....
但我肯定冇乜可能，因為自私既佢絕對唔會為左我咁做.....
呢一點我好清楚，而且佢更應該會情願同我斷絕來往都唔會同人地斷絕來往....
可悲既事情將要發生了，因為「恨」一d好小好小既事都變成一粒砂一樣容不入眼
就算一d好雞毛蒜皮既事，心裡都會無名火起，處處不滿....
我真係唔想再係咁落去....唔通真係要行到果一步先係最好既解決方法?
如果想令我康復，相信要比一般人出多幾倍力才能將我治愈
但我諗唔在乎我既佢....都冇乜可能會為左我咁做....
始終見到自己女人叫人地做「老公」不論係應真定係玩
都係絕對唔可以接受....
究竟...佢有冇或者識唔識照顧我感受?
究竟...我仲要唔開心到幾時?
究竟...究竟.....
或者...或者.......
無言...無奈....
尋日做野重遊某地...仲要響某商場見到吳雨霏....
行過既每一處地方，都清楚見到兩雙腳印...
只是白晝同夜晚既分別...
經過既店鋪，都重演一些零碎既片段....
離遠望到某梯間....呆站了一會.....
相信這都是巧合吧....別想太多....
生日快到了，要約大家一齊去陽光與海灘
希望可以再好似以前咁齊人就好啦 |
|
|||
|
|
